Ovdal abortta
Ovdal abortta sáhttet badjánit gažaldagat ja dárbbut beassat ságastit muhtumiin. Oallugat leat vuohččan dahkan abortta ja lea ođđa ja amas dilli. Don soaittát ožžon diehtojuohkima muhto it muitte das olus, soaittát vuordime diimmu buohccivissui dahje leat juo leamaš álgoiskamis?
Muhtumiidda lea guoibmi, ustit dahje bearaš buoremus veahkkin, muhto nuppiide soaitá ságastallan profešuvnnalaš bealátkeahtes olbmuin leat ávkkálaš.
Jus háliidat ságastallat bealátkeahtes fágaolbmuin, de sáhtát váldit oktavuođa Amatheain, earvvasvuođabuohccedivššáriin, fástadoaktáriin dahje jorttamovrrain.
Go minguin ságastat de lea deháleamos ahte don beasat muosis muitalit dan mii dutnje lea mávssolaš. Amathea galgá leat oadjebas báikin gos don beasat rahpasit hupmat earáid oaiváladdamiid haga.
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastallat ovdal ja maŋŋel abortta. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.