Maŋŋel vahkku 12
Jus áiggut váldit abortta maŋŋel 12. vahkku loahpa (11 vahkku ja 6 beaivvi), de fertet ohcat sierra lobi dan dahkat. Dalle sáddet sisa gáibádusa das. Don sáhtát váldit oktavuođa njuolga buohcciviesuin, iežat fástadoaktáriin dahje gynekologain. Don válljet ieš guđe buohccivissui gáibádusa galgá sáddet.
Amathea sáhttá maiddái veahkehit du dainna.
Nammagoddi
Maŋŋel go leat ohcan sierralobi de bovdejuvvot čoahkkimii nammagottiin mas leat guokte doaktára (okta nissondoavttir ja okta dievdodoavttir). Dus lea riekti čoahkkinastit nammagottiin, muhto válljet ieš háliidat go dasa oassálastit. Jus it hálit čoahkkinastit nammagottiin, de sáhtát ieš dahje du doavttir sáddet čálalaš ákkastallama nammagoddái oktan gáibádusain beassat dahkat abortta.
Jus oassálasttát, de sáhtát váldit mielde nuppi olbmo. Nammagoddečoahkkimis beasat muitalit iežat dili birra ja manin don dáhtut abortta váldit. Nammagotti lahtut guldalit du ja du čilgehusa ja váldet dan vuhtii go árvvoštallet.
Maŋŋel nammagoddečoahkkima oaččut dieđu lea go ášši dohkkehuvvon dahje hilgojuvvon. Mearrádus galgá leat čálalaš ja don galggat oažžut ákkastallama áššái. Jus ohcan hilgojuvvo, de sáddejuvvo mearrádus guovddáš váiddanammagoddái mii ođđasis meannuda, jus don it geassát ohcamis lobi. Dat lea danin vai visot ohcamat Norggas ožžot dásseárvosaš meannudeami. Eatnasat geat ohcet abortta maŋŋel vahkku 12 ožžot ohcama dohkkehuvvot. Mađi guhkkelii lea vázzán áhpehisvuođas dađi garraset eavttut.
Aborta maŋŋel vahkku 12 áhpehisvuođas čađahuvvo duššefal buohcciviesuin. Don oaččut dálkasiid mat vuolggahit ávttaid johtui ja aborta álgá. Oaččut dálkasiid mat váidudit bákčasiid dasságo aborta lea ollašuvvan. Lea dehálaš ahte muitalat maid don dárbbašat go leat buohcciviesus.
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastit abortta birra, goas dál de leaš dáhpáhuvvan dahje guđe láhkai aborta dáhpáhuvai. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.