Aborta Norggas
Norggas lea juohkehaččas riekti ieš mearridit háliida go váldit abortta gitta 12. vahkku rádjái áhpehisvuođas. Don sáhtát válljet juogo kirurgalaš dahje medisiinnalaš abortta, ja jus válljet medisiinnalaš de sáhtát válljet háliidatgo buohcciviesus dahje ruovttus dan čađahit. Jus dáhtut abortta maŋŋel vahkku 12 (11 vahkku ja 6 beaivvi), de fertet abortanammagottis ohcat lobi.
Abortarájit Norggas
Norgga abortaláhka addá áhpehisolbmui rievtti ieš mearridit abortta gitta áhpehisvahkku 12 (11 vahkku ja 6 beaivvi) rádjái. Áhpehisvuođa rehkenastet maŋemus mánnodávdda vuosttaš beaivvi rájes. Don sáhtát áramusat váldit abortta vahkku 6 rájes, ja dan sáhtát dahkat medisiinnalaš dahje kirurgalaš vugiin. Goabbá vuohki lea buoret, lea dan duohken man guhkás áhpehisvuođas lea ollen, ja leat go eará medisiinnalaš árttat.
Lea go aborta nuvttá?
Aborta lea nuvttá jus ásat Norggas, jus leat EU-riikkas eret dahje jus du ruovtturiikkas lea buohccedikšosoahpamuš Norggain. Jus it dieđe sihkkarit lea go dutnje nuvttá, de sáhtát váldit minguin oktavuođa vai mii veahkehit du gávnnahit movt lea. Dus lea riekti oažžut dahkat abortta jus orostalat riikkas.
Aborta ovdal vahkku 12
Don sáhtát friddja válljet gaskal kirurgalaš dahje medisiinnalaš abortta nu guhká go lea medisiinnalaččat bealuštahtti. Buohcciviesus oaččut eanet dieđuid goappaš vugiid birra go lea álgoiskamis.
- Medisiinnalaš aborta sáhttá dahkkot ruovttus gitta áhpehisvuođa 9.vahkku rádjái dahje buohcciviesus áhpehisvuođa vahkku 12. rádjái.
- Kirurgalaš aborta sáhttá dahkkot vahkku 12 rádjái
Aborta maŋŋel vahkku 12
Jus dáhtut abortta váldit ja leat áhpehisvuođavahkku 12 loahpas (11 vahkku ja 6 beaivvi), de fertet ohcat lobi. Aborta maŋŋel áhpehisvuođavahkku 12 čađahuvvo duššefal buohcciviesus. Váldde njuolgga oktavuođa buohcciviesuin gos lea abortanammagoddi, fástadoaktáriin dahje gynekologain. Don dahje dat doavttir geainna válddát oktavuođa galgá čállit čálalaš gáibádusa ja ákkastallama manin don dáhtut gaskkalduhttit áhpehisvuođa. Doavttir sádde ákkastallama oktan abortagáibádusain ja eará gullevaš dárbbašlaš medisiinnalaš dieđuid buohcciviesu abortanammagoddái.
Abortanammagoddi
Nammagottis leat guokte doaktára ja dat meannudeaba abortaohcamušaid maŋŋel áhpehisvuođa 12. vahkku. Maŋŋel go leat ohcan sierralobi de bovdejuvvot čoahkkimii nammagottiin. Muhtumiidda soaitá leat buoremus oassálastit video bokte. Jus háliidat sáhtát váldit mielde muhtuma nammagoddečoahkkimii. Dus lea riekti čoahkkinastit nammagottiin, muhto it leat geatnegas oassálastit.
Nammagoddečoahkkimis beasat eanet muitalit manin don dáhtut gaskkalduhttit áhpehisvuođa. Abortanammagoddi sakka deattuha movt don ieš árvvoštalat dili. Jus du ohcan hilgojuvvo, de sáddejuvvo ášši abortaváiddanammagoddái.