Go ii leat ovttaoaivilvuohta
Sáhttá leat váttis ságastit jus ii leat ovttaoaivilvuohta das ahte gaskkalduhttit dahje ollašuhttit áhpehisvuođa. De sáhttet čuožžilit garra dovddut, oaivilat ja dáhtut mat sáhttet dagahit ahte lea váttis guldalit nuppi ja ipmirdit maid son dovddaha. Ipmirdit nuppi ja boahtit ovtta oaivilii ii leat álo álki.
Amatheas deaivvadit mii olu olbmuiguin, báraiguin ja bárraguimmiiguin iešguđet dilis – sihke de go lea áigi válljet ollašuhttá go dahje gaskkalduhttá go áhpehisvuođa, ja maŋŋel go ohki lea eret válddihuvvon. Mii diehtit ahte oallugat dovdet oadjebasvuođa ja ávkki das ahte lea goalmmát neutrála bealli mielde ságastallamis.
Ságastallamis minguin galgat mii láhčit dili nu ahte beassabeahtti muitalit mii dudnuide lea dehálaš. Mii eat váldde beali, ja mii háliidit veahkehit dudno ipmirdit maid háliideahppi dovddahit, ahte váldibeahtti goabbat guoimmisteatte vuhtii ja ahte mii ovttas gávnnahit buoremus vejolaš čovdosa. Sáhttet badjánit olu iešguđetlágán reakšuvnnat ja dovddut dáin ságastallamiin, mis ii leat fasihtta masage, dasa gal leat hárjánan.
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastallat abortta ja áhpehisvuođa birra. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.