Movt diŋgot abortta?
Jus dáhtut diŋgot áiggi abortta váldimii de sáhtát riŋget buohccivissui ja ieš diŋgot áiggi, dahje sáhtát bivdit veahki fástadoaktáris dahje gynekologas. Jus ieš diŋgot, de válddát oktavuođa buohcciviesu dustehusain dahje gynekologaossodagain. Don it dárbbaš čujuhusa fástadoaktáris, it ge don dárbbaš ákkastallat iežat mearrádusa. Ii gáibiduvvo jurddašanáigi.
Dat diibmu maid diŋgot leat álgoiskamii ja ságastallamii buohcciviesus. Álgoiskamis mihtidit du varradeattu ja guldalit váimmu ja geahppáid, ja gehččet ultrajietnarusttegiin juste man galle vahkku don leat leamaš áhpeheapmin. Iskan lea siskkáldas ultrajietnadutkamuš, lea guhkes sággi mii coggojuvvo cinnái.
Buohcciviesu dearvvašvuođabargit leat geatnegahtton addit dutnje buori diehtojuohkima buot molssaeavttuin (medisiinnalaš dahje kirurgalaš abortta birra) ja ahte dus lea vejolašvuohta čađahit dán buohcciviesus dahje ruovttus.
Dearvvašvuođabargit galget addit dutnje dieđuid ja bagadusa objektiivvalaš vugiin eaige dovddahit iežaset persovnnalaš árvvoštallamiid. Dus lea riekti oažžut dulkka ságastallamis jus dárbbašat. Lea vuogas addit dieđu dan birra go diŋgot vuosttaš diimmu.