Vásihit preassa abortta dáfus
Sáhttá leat lossat jus dovdá preassa váldit abortta dahje ii. Dan preassa sáhttá dovdat máŋgga ládje ja dat sáhttá boahtit omd. guoimmis, bearrašis, ustibiin, dan kultuvrras mas eallá dahje muhtomin alddis.
Áhpehisvuođas sáhttá dovdat aktovuođa ii ge leat álo álki diehtit maid dárbbaša ja gos veahki oažžu. Dovddat go don preassa ja dárbbašat veahki? Váldde oktavuođa Amatheain, mii veahkehit du!
Ii leat álki diehtit maid dakkár dilis dárbbaša. Lea dábálaš dovdat ilu, eahpesihkarvuođa, eahpádusa, doaivaga, balu ja fuolastuvvama. Min neahttasiiddus gávnnat dieđuid ja váldde áinnas Amatheain oktavuođa goas fal beare, mii veahkehit du!
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastallat olbmuiguin geat árvvoštallet váldit abortta. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.