Leago aborta nuvttá?
Buohkain geat orrot Norggas lea riekti oažžut váldit abortta dálá njuolggadusaid mielde. Lea nuvttá váldit abortta juohkehažžii gii orru Norggas.
Don it dárbbaš čujuhusa fástadoaktáris jus áiggut váldit abortta. Don sáhtát ieš váldit oktavuođa buohcciviesuin ja diŋgot áiggi abortta váldit. Lea friddja buohcciviessoválga, ja dat mearkkaša ahte válljet ieš guđe buohcciviesu dáhtut.
Buot nissonolbmuin geat orrot Norggas lea riekti váldit abortta, juogo iešdáhtus dahje nammagotti meannudeami maŋŋel.
Orut go Norggas?
Aborta lea nuvttá nissonolbmuide geat orrot Norggas.
It oro Norggas?
Nissonolbmot geat eai oro Norggas, muhto leat álbmotoaju lahtut dahje geat gullet buohccidikšosoahpamuša vuollái eará riikkain, sáhttet oažžut goluid máksot álbmotoajus. Earát fertejit ieža máksit abortta. Buohcciviessu ii sáhte almmotge ovdagihtii gáibidit mávssu.g.
Jus dáhtut diehtit lea go dutnje nuvttá, de váldde áinnas oktavuođa minguin vai sáhttit veahkehit du.
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastallat abortta birra. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.