Iešdáhtolaš aborta
Muhtumiidda lea áigi maŋŋel abortta nu movt lei vuordán, muhto muhtumiidda dovdo áibbas earalágánin. Lea dábálaš ahte sáhttá dovdat olu iešguđetlágán dovdduid nugo geahpádusa, suhtu, gáhtama, šlunduma, eahpesihkarvuođa ja morraša. Dat dovddut sáhttet boahtit dakka maŋŋel dahje muhtun áiggi maŋŋel. Lea maiddái dábálaš ahte olmmoš dovdá olu dovdduid oktanis, ja dilli šaddá moivvas.
Amatheas oaidnit mii ahte oallugiidda lea buorre ja dehálaš beassat ságastit nuppi olbmuin maŋŋel, vai oažžu vástádusaid, beassá čorget jurdagiid ja muitalit vásáhusa cuovkanemiin. Dat sáhttá veahkehit ipmirdit iežas reakšuvnnaid ja dovdduid maŋŋel cuovkaneami, ja dat sáhttá leat mávssolaš vai nagoda gieđahallat dili ja birgehallat maŋŋel.
Dárbbašat go don ságastit ovttainge?
Amatheas deaivvadat dearvvašvuođabargiiguin geain lea guhkes hárjáneapmi ságastallat abortta birra. Mii leat bealátkeahtes dearvvašvuođabálvalus, mis lea jávohisgeasku ja mii veahkehit du dan dilis mas don leat ja dainna válggain maid leat dahkan. Don oaččut min lusa boahtit akto, guimmiin fárrolaga dahje suinna geainna don leat šaddan áhpeheapmin.
Visot min bálvalusat leat nuvttá. Mii fállat ságastallama dárogillii, sámegillii ja eŋgelasgillii, eará gielaide diŋgot dulkka. Ságastallan bistá sullii diimmu, ja mii sáhttit deaivvadit video dahje telefovnna bokte, dahje min kantuvrrain. Don mearridat ieš galle háve dárbbašat ságastallama, de soahpat dan ovttas.